Guests Arriving | مہمانوں کی آمد

ویسے تو سال میں 2 ہی عیدیں ہوتی ہیں. عید کے دن وہ مخصوص دن ہوتے ہیں جس میں مسلمان خوشیاں تقسیم کرتے ہیں. ایک دوسرے سے ملاقات کرتے ہیں. تحفے تحائف دیتے ہیں اور اپنے مسلمان بہن بھائیوں سے عالمی اخوت کا اظہار کرتے ہیں. بچوں کے لیے اس دن کا اصل مزہ اپنے ہم عمر بچوں کے ساتھ کھیل کود ہوتا ہے. مزے کی بات یہ ہے کہ جس دن بھی بچے اکٹھے ہوں وہ دن ان کے لیے عید کا دن ہو جاتا ہے. سب بچے مل کر وہ طوفان برپا کر دیتے ہیں کہ ماں باپ کو اسے سمیٹنے میں ہفتوں لگ جاتے ہیں. جب بھی گھر میں کوئی مہمان آتا ہے تو بچوں کی موجیں لگ جاتی ہیں. بڑے بھی ان کی آمد پر بہت خوش ہوتے ہیں. مہمانوں کی خاطر تواضع کی جاتی ہے. ان کا اکرام کیا جاتا ہے. ان کے ساتھ بیٹھ کر وقت بتایا جاتا ہے. اور ان لمحات کو قیمتی بنایا جاتا ہے.

قریبی رشتہ دار:

مہمان کئی قسم کے ہوتے ہیں. کچھ قریبی اور کچھ دور کے رشتہ دار. کچھ جاننے والے اور کچھ انجان. پھر قریبی رشتہ داروں میں بھی کچھ قریبی ایسے ہوتے ہیں جو آپ کے شہر میں ہی رہتے ہیں اور مہینے بعد ضرور چکر لگا لیتے ہیں اور کچھ قریبی رشتہ دار دور کے شہروں میں رہتے ہیں اور سال میں ایک آدھ دفعہ ہی مہمان نوازی کا موقع دیتے ہیں. ان دور رہنے والے مہمانوں کا خیال نسبتاً زیادہ رکھا جاتا ہے. مگر بچوں کو ان سے مناسبت کم ہوتی ہے. کیونکہ بچوں کو بھی دوستیاں کرنے کے لیے ملاقاتیں درکار ہوتی ہیں. وہ انہیں بچوں کے ساتھ کھیلنا کودنا پسند کرتے ہیں جن بچوں کے ساتھ وہ عام طور پر کھیلتے رہتے ہیں. نئے بچے آپس میں کھیلنے سے شرماتے ہیں. دور سے آنے والے قریبی رشتہ داروں کی آمد پر البتہ یہ فائدہ ضرور ہوتا ہے کہ ان کے ساتھ باہر کہیں گھومنے پھرنے کا پلان ضرور بنایا جاتا ہے. ہم بھی جب کسی رشتہ دار کے ہاں دوسرے شہر میں مہمان بن کر جاتے ہیں تو ہماری بھی خواہش ہوتی ہے کہ ہم اس علاقے کے پر کشش مقامات دیکھیں. گھومیں پھریں اور لطف اندوز ہوں. کراچی میں آنے والے مہمانوں کو عام طور پر ساحل سمندر پر جانے کی خواہش ہوتی ہے. ہم مقامی ہو کر بھی سالوں بعد سمندر دیکھنے تبھی جاتے ہیں جب دور سے کوئی رشتہ دار آیا ہوا ہو. دور سے آنے والے رشتہ داروں کا یہ فائدہ ہو جاتا ہے. رہی بات قریب رہنے والے قریبی رشتہ داروں کی، تو ان کی خاطر تواضع معمول کے مطابق کی جاتی ہے. بچے ان کے بچوں کے ساتھ خوب اچھل کود کرتے ہیں. لیکن بڑے بات چیت پر ہی اکتفا کرتے ہیں.

انجان مہمان:

کبھی کبھی ایسا ہوتا ہے کہ ہمارے گھر میں کوئی ایسا شخص مہمان بن جاتا ہے جس سے ہم واقف نہیں ہوتے. جیسے کبھی ابو کے دوست آجاتے ہیں تو کبھی امی کی سہیلیاں. اب ان کے سامنے نہ بندہ کچھ کہہ سکتا ہے نہ ہی پیچھے رہ سکتا ہے. اس لیے مجبوراً ان کی آؤ بھگت کرنی ہی پڑتی ہے. اسی طرح بھائی کے دوست اور بہن کی سہیلیاں یا ہمارے اپنے دوست جب آتے ہیں تو ہم ان کو علیحدہ طور پر کمرے میں بٹھا کر ان کا اکرام کرتے ہیں. انجان مہمان کو عمومی طور پر زیادہ دیر گھر میں نہیں ٹھہرایا جاتا. بلکہ جلد از جلد رخصت کیا جاتا ہے. کیونکہ ہمارے معاشرے میں پردے کا رواج ہے. اس لیے انجان مہمان کو صرف وہی شخص ڈیل کرتا ہے جس نے اسے بلایا ہو. باقی افراد رسمی طور پر سلام دعا کرتے ہیں. بسا اوقات ایسا بھی ہوتا ہے کہ ہمارے قریبی رشتہ دار بھی جن کے ہاں زیادہ آنا جانا نہیں ہوتا، وہ بھی انجان محسوس ہوتے ہیں. اس لیے میں تو کہتا ہوں کہ ہر دو تین مہینوں میں یا کم از کم سال میں ایک دفعہ لازمی اپنے تمام رشتہ داروں سے ملاقات ضرور کرنی چاہیے. ایسا نہ ہوں کہ ہمارے سگے رشتہ دار ہی ہمیں بھول جائیں. رشتے ناطے ہم خود نہیں بناتے بلکہ یہ خدا کی طرف سے ہمیں عطا کیے جاتے ہیں. ان سے جڑے رہنا بھی ان کا حق ہے. اس سے ہمیں رشتہ داروں کے حالات معلوم ہوتے ہیں. انہیں ہمارا پتہ چلتا ہے. ذہنی موافقت ہوتی ہے اور روابط کا خوشگوار سلسلہ استوار ہوتا ہے.

خاص ترین مہمان:

ملک پاکستان کے باشندے دنیا بھر میں اپنی مہمان نوازی کی وجہ سے بہت زیادہ مشہور ہیں. رشتہ داروں اور دیگر عام مہمانوں کی تو خاطر تواضع ہوتی ہی رہتی ہے. لیکن خاص ترین مہمانوں کی خصوصی طور پر مہمان نوازی کی جاتی ہے. عمدہ سے عمدہ پکوان تیار کرکے ان کے سامنے پیش کیے جاتے ہیں. بیرون ملک سے آنے والے مہمانوں کا زیادہ اکرام کیا جاتا ہے. مہمان نوازی اور کھانا کھلانے کا مقصد صرف آپس میں محبت، اخوت اور رواداری پیدا کرنا ہوتا ہے تاکہ آپس میں ایک دوسرے کے درمیان محبت و الفت کی فضا پیدا ہو. مہمان کھانے پینے کے بھوکے نہیں ہوتے، کھانا پینا تو ہوٹل یا ریسٹورنٹ پر بھی مل جاتا ہے، دراصل وہ کھانے میں شامل خلوص اور محبت کے لیے آتے ہیں. اگر ہم ان سے آنکھیں پھیر لیں، انہیں توجہ نہ دیں یا ڈھکے چھپے انداز میں ان سے بے زاری کا اظہار کریں تو مہمان اپنی توہین محسوس کرتا ہے. ظاہر سی بات ہے اگر کوئی مہمان آپ سے ملاقات کے لیے اتنا سفر طے کرکے آئے اور آگے سے اسے منفی رویہ کا سامنا کرنا پڑے تو وہ دوبارہ کبھی نہیں آنا چاہے گا. لہٰذا ہماری یہ ذمہ داری بنتی ہے کہ ہم اپنی روایات کو زندہ اور برقرار رکھتے ہوئے آنے والے مہمانوں کی مہمان نوازی میں کوئی کسر نہ چھوڑیں. اس سے ہمارے درمیان محبتیں اور الفتیں پروان چڑھیں گی اور ایک خوشگوار معاشرہ تشکیل پائے گا.