သင်္ကြန် ပြီးပြန်ပြီ ( Henry Aung )

မင်္ဂလာပါ။ ယနေ့ကတော့ အတာသင်္ကြန် နောက်ဆုံးနေ့မို့ လမ်းထဲရှိ ခလေးများအားလုံး ထွက်ကာ ရေကစားနေကြသည်ကိုတွေ့ရပါသည်။ မိခင်များကလည်း ခလေးထိန်းသလို ဘာလိုနှင့် ရေပက်နေကြပါသည်။ အချို့ အပျို လူပျိုများကလည်း လမ်းထိပ်ပစ္စည်းသွားဝယ်သလို ဘာလို နှင့် နှစ်ယောက်တွဲ သုံးယောက်တွဲ ရေပက်ခံထွက်နေကြသည်ကို တွေ့ရပါသည်။

ရေကစားသူတို့ကလည်း လမ်းမတန်းသို့ ထွက်ကာ ရေကစားကြသည်မဟုတ်။ မိမိတို့ လမ်းထဲတွင်သာ ရေကစားကြခြင်း ဖြစ်ရာ လမ်းလျှောက် လည်ပတ်သူတို့ကလည်း တလမ်းဝင် တလမ်းထွက်လမ်းလျှောက်သွားနေကြပါသည်။

ဆောင်းဘောက်များမှ ထွက်နေကြသော မြူးမြူးကြွကြွ သင်္ကြန် သီးချင်းသံများအား ကြာရှည် တောင့်ခံထားနိုင်ပုံမရကြပါ။ လူကြီးများကလည်း ဟိုတစု ဒီတစု နှင့် ပုလင်း ဖွင့်နေကြသည်ကိုတွေ့ရပါသည်။ ခိုက်ရန် ဖြစ်သံတော့ မကြားရပါ။

နံနက် ၁၀ နာရီခန့်မှ ခလေးများ အုံးအုံးထရေကစားလိုက်ကြသည်မှာ နေ့လည် ၁ နာရီခန့်ထိ ထို့နောက် ခေတ္တခဏမျှ ငြိမ် သက်သွားကာ ညနေသုံးနာရီ ထိုးသည်နှင့် တူးပို့ တူးပို့ အသံများက ထပ်မံ ထွက်ပေါ်လာကြပါတော့သည်။ ညနေပိုင်း ရေကစားကြသည်တော့ ပို၍ မြိုင်ဆိုင်လာကြပါသည်။

မနက်ဖြန်ဆိုလျင် နှစ်သစ်ကူး တော့မည် ဆိုတော့ ယခုညနေ အညစ်အကြေးများအား ရေလောင်း သန့်ရှင်းကြဟန်တူပါသည်။ အချို့ ခပ်ကဲကဲ ကောင်လေးများကတော့ အိုးမဲ လိုက်သုတ် နေသည်ကို တွေ့ရပါသည်။ ကျွန်တော်နှင့် မဟေသီကတော့ တနေ့လုံး ဆိုင်ထိုင်ရင်း ကလေးများ ရေကစားနေကြသည်ကို ထိုင်ကြည့်နေကြပါသည်။

၂ နှစ် ၃ နှစ် သားအရွယ် ခလေးများကလည်း ဖင်လေးတွန့်လိမ် တွန့်လိမ် ဖြင့် ကနေကြသည်မှာ အသည်းယား စရာ။ သင်္ကြန်နှင့် တွဲဖက်၍ အလှူအတန်း စားစရာများကလည်း တသောသော ရောက်လာကြပါသည်။

မုန့်လက်ဆောင်း / ကျောက်ကျော / အုန့်နို့သာကူ / မုန့်လုံးရေပေါ် ကတော့ ဖော့ဘူးနှင့် ၃ / ၄ ဘူး ခန့်ရှိမည် ထင်ပါသည်။ ထို့အပြင် သရော်ကင်ပွန်း ခေါင်းလျှော်ရည် ထုပ်လည်း လာပေးသွားကြပါသည်။ အချို့သော အမယ်ကြီးများ နှင့် အန်တီကြီးတို့က ရောဂီ တဘက်လေးများ ပုခုံးတင်ကာ နံနက်စောစော လမ်းထိပ် ဘုန်းကြီးကျောင်း တွင် ဥပုသ် သီလယူရန် သွားကြပါသည်။

တိုက်ခန်း အပေါ်ထပ်နေသူတို့ကလည်း ရေထွက်မကစားကြသည့်တိုင် အိမ်ရှေ့ ရန်တာပေါ်မှ ခလေးများရေကစားနေကြသည်ကို ထွက်ကြည့်နေကြပါသည်။ညနေ နေကျချိန်ရောက်လာလေ သီချင်းသံများ အော်ဟစ် ရေပက်သံများက ပို၍ ဆူညံလာကြပါတော့သည်။ အချို့မိဘများကလည်း လိုက်လံ တားမြစ်နေကြသည်ကို တွေ့ရပါသည်။

ကျွန်တော် သတိထားမိသည်မှာ လမ်းထဲသို့ မည်သည့် ကားမှ ဝင်မလာခြင်း ဖြစ်ပါသည်။ ခါတိုင်း ကားများ ဝင်ထွက်သွားလာကြသဖြင့် ခလေးများအား ဟန့်နေရသည်ဖြစ်ရာ ယနေ့ကတော့ ကားအသွားအလာ မတွေ့ရပါ။ ခလေးများ လမ်းထဲ ရေပက် ကစားကြသည်မှာ တခုတော့ကောင်းပါသည်။ တလမ်းလုံးရေ ရွှဲသွားကာ အမှိုက်သရိုက်များ ကင်းစင်သွားပါတော့သည်။

ကျွန်တော်တို့ စမ်းချောင်းဘက်တွင် မီးမပျက်သည်မှာ ၃ ရက်ခန့် ရှိပြီ ဖြစ်ရာ ရေကလည်းဖောချင်းသောချင်းရနေကြသည်ဆိုတော့ ခလေးများ ကစားလိုက်ကြစမ်း ဆိုသည်မှာ။ ညနေ ၅ နာရီခွဲ တွင်တော့ အားလုံး သိမ်းသွားကြပြီ ဖြစ်ပါသည်။ တနှစ်သာ သင်္ကြန်တော့ ပြီးသွားပြန်ပြီ။

ခေတ်ကာလ ကောင်းလျင် ပြည်သူတို့ ဝက်ဝက် ကွဲ ပျော်ကြမည့် ပွဲ ဖြစ်သော် နေရာ ကွက်ကျားလိုက်၍ ခလေးများသာ ပျော်ခွင့် ရခဲ့ကြပါသည်။ ယခုနှစ် ဤ သင်္ကြန်သည် အနုပညာရှင် များ အနေဖြင့် ပြည်သူချစ်သော အနုပညာရှင်နှင့် အလိုက်သင့် အရောင်ပြောင်း တတ်သော အနုပညာရှင်တို့အား ကွဲကွဲပြားပြား သိရသော သင်္ကြန် ဖြစ်ပါသည်။

အချို့ကလည်း အမေလာလျင် အမေ့သားသမီး ဖြစ်သွားကြပြီး အဘပြန်လာလျင် လက်အုပ်ကလေးချီကာ အဘ သားသမီးများ ဖြစ်သွားကြပြန်ပါသည်။ အမေလည်း မဟုတ် အဘ လည်း မဟုတ် ၍ ကြားနေသူများကလည်း ရှိနေပါသေးသည်။

၃ / ၄ နှစ်လောက် အဘတို့ အခြေခိုင်သွားပြီ ဆိုလျင် အဘတို့ဘက် ခြေစုံ ပစ်ဝင်လိုက်မည်ဖြစ်ပြီး အမေ ပြန်လာလျင်တော့ ဝယ်ယူထားသော ဘွန်းစာရွက်များပြကာ မည်သို့မည်ပုံ ခက်ခဲ ခဲ့ကြောင်း ခက်ခဲသော်လည်း ဘွန်းဝယ်ပြီး အမေ့အား ထောက်ခံခဲ့ကြောင်း မျက်ရည်ခြူပြမည် ဖြစ်ပါသည်။ လောကတွင် ကြောက်စရာ အကောင်းဆုံးမှာ ဤသို့သော သာကူးများ ဖြစ်ပါသည်။

တဖက်တည်း ပြတ်ပြတ်သားသား ရပ်သည်မဟုတ် ကြားခွ ထိုင်ထားကြသူများ ဖြစ်ပါသည်။ မည်သို့ပင်ဆိုစေ အပြောင်းအလည်း များကတော့ မြင်နေကြရပြီ ဖြစ်ပါသည်။

ဤ သင်္ကြန် ကိုကြည့်၍ မိမိတို့ဘက် ပြည်သူ တို့မရှိသည်ကို မြင်တတ်၍ ညဏ်ရှိသူတို့ မိမိတို့ သမိုင်း ရေးကြပါလိမ့်မည်။ ညဏ်နည်းသူ တစောက်ကမ်း တို့ အတွက် တော့ အမြင်မှန် ရကြမည်လည်း မဟုတ်ပါ။ အဘယ့်ကြောင့်ဆိုသော် ထိုသူတို့ အတွက် လမ်းမှာ ထိုသူတို့ ကိုယ်တိုင် ဖေါက်ထားပြီး ဖြစ်ပါသည်။

Henry Aung ( Kachin )

16/04/2022 - Saturday - 17;54 Pm