ကျွန်တော်နှင့် ပုဂံဘုရားများ ( Henry Aung )

မင်္ဂလာပါ။ ယနေ့ စံတော်ချိန် သတင်းစာ ဖတ်နေချိန်တွင် သတိထားမိသော သတင်းတခုမှာ ပုဂံ ဒေသမှ ရှေးဟောင်း အမွေအနှစ် ဆင်းတုတော်များ ခိုးယူခံရသည့် အကြောင်း ဖြစ်ပါသည်။ ရှေ့ဟောင်း အမွေအနှစ် များနှင့်ပတ်သက်၍ ကျွန်တော်အများကြီးနားမလည်ပါ။

သို့သော် ဤသို့သော ရှေ့ဟောင်း အမွေအနှစ်များ ကြည့်ရှုရန် ကမ္ဘာလှည့် ခရီးသည်များ လာကြသော ကြောင့် ခရီးသွားလုပ်ငန်းများ အဆင်ပြေကြခြင်း ဖြစ်ပါသည်။ ရှေးဟောင်း အမွေအနှစ် ဘုရား ဆင်းတုတော်များ စိတ်ဝင်စားဖွယ်ရာ သမိုင်း လက်ရာများ မရှိတော့လျင် မည်သူက တကူးတကလာကြည့်ကြမည် မဟုတ်တော့ပါ။

ဝိသမလောဘ သားများကလည်း ခေတ်ကာလ မကောင်းသည်ကို အခွင့်ကောင်းယူ၍ ကြံစည်ကြခြင်း ဖြစ်တန်ရာ။ တကယ်တမ်းတွေးကြည့်လျင်တော့ ဤသတင်း ဖတ်မိသူတိုင်း "ဤသူခိုး ငါသိသလိုလို" ဟူ၍ တွေးတောနေကြပါလိမ့်မည်။

ဆရာ ဦးအောင်သင်း ပြောသကဲ့သို့ " တော်တို့ရွာက မှန်တာပြောရင် ပါးရိုက်တယ်တော့ " ဟူ၍သာ မည်သူမျှ မပြောလိုခြင်းသာ ဖြစ်ပါလိမ့်မည်။ ဤ နိုင်ငံတွင် ဘုရားဗိုက်ဖောက်ဝံ့သူ / ဘုရား လက်လိမ်ချိုး ဝံ့သူ တို့ သီးသန့်ရှိနေကြသည်ကို လူတိုင်း အသိဖြစ်ပါသည်။

တကယ်တော့ ကျွန်တော် ပုဂံသို့ တခေါက်သာ ရောက်ဖူးပါသည်။ တခေါက်ဆို တခေါက် ဆိုသလောက် အတော်လေး ပျော်ခဲ့ရသော ခရီးစဉ်ဖြစ်ပါသည်။ ဧရာဝတီ မြစ်ရေတက်ချိန် ဝါးကျောင်း အနောက်ဘက် ထနှောင်းပင်ရိပ် အောက်ရှိ ကွပ်ပျစ် ပေါ်မှ တဖက်ကမ်း မင်းဝံ့တောင် လား တန့်ကြည် တောင်လား မသိ ထိုတောင်တန်းအား ကြည့်ရသည်မှာ အလွန် အရသာ ရှိပါသည်။

ကျွန်တော့ အတွေးထဲတွင်တော့ ဧရာဝတီမြစ်နှင့် တွဲဖက်၍ ကြည့်လိုက်လျင် မည်သည့် မြင်ကွင်း ဖြစ်စေ အလွန်လှပနေသည်ဟု ခံစားရပါသည်။ နောက်တနေရာမှာ ဧရာဝတီမြစ်ကမ်းပါး နားတွင်ရှိနေသော လူမသိသူမသိ ဘုရားများ ဖြစ်ပါသည်။ သက်ကိုဇော် ကျေးဇူးကြောင့်သာ ထိုကဲ့သို့ ဂျောင်ဂလောင်မှ ဘုရားများ ဖူးခွင့်ရခြင်း ဖြစ်ပါသည်။

နောက်တနေရာမှာ ဗူးဘုရား ရင်ပြင်မှ ဧရာဝတီ မြစ်ကို လှမ်းကြည့်ရသော မြင်ကွင်း ဖြစ်ပါသည်။ ကျွန်တော့ မျက်လုံးထဲတွင် ဤမျှ ကျယ်ပြန့်လှသော ဧရာဝတီ မြစ်ပြင်ကြီးအား မတွေ့ဖူးသေးပါ။ ဧရာဝတီ မြစ်အား ဗူးဘုရား ရင်ပြင်မှ ကြည့်ရသော ခံစားချက်နှင့် ညချမ်းအချိန် မန္တလေး တောင် ရင်ပြင်မှ မန္တလေး မြို့အား ကြည့်ရသော ခံစားချက် တို့ အတူတူသာ ဖြစ်ပါသည်။ ကျွန်တော် စာဖြင့် မရေးပြတတ်ပါ။

နောက်တခု ကျွန်တော် ပုဂံအား သဘောကျရသည့်အကြောင်းမှာ ထန်းရည်ခါး ကြောင့် ဖြစ်ပါသည်။ သက်ကိုဇော် ခေါ်သွားသော ထန်းရည်ဆိုင်က ထန်းပင်များ အောက်တွင် ရှိနေပြီး ထန်းလက်မိုး တဲနှင့် ဖြစ်ပါသည်။ မြူအိုးနှင့်သောက်မည်လား ဖန်ခွက်ဖြင့် သောက်မည်လား။

ဖန်ခွက်ထဲ ငှဲ့ထည့်လိုက်လျင် ငှက်ခါးတောင် အရောင်ထွက်ကာ ပုဇွန်ဆိတ် ခုန်သကဲ့သို့ ထန်းရည် မြုပ်များက ( ထခုန်သည်ပဲ ပြောရမည်လား ထပွက်နေသည်ပဲ ပြောရမည်လား ) မရေးပြတတ်တော့ပါ။ ရေခဲစိမ်ထားသဖြင့် အေးမြနေသော ထန်းရည်အား တခွက်လုံး တကြိုက်တည်း သောက်လိုက်ရသည့် အရသာက သောက်ဖူးသူသာ သိပါလိမ့်မည်။ ထို့နောက် အာဗြဲခြောက်ဖုတ် ကောက်ဝါးလိုက်။ စာရေးနေရင်းကပင် ပါးစပ်စိုလာကာ တံတွေးမျိုချနေရပါပြီ။

ကျွန်တော် ပုဂံရောက်ခဲ့စဉ်က အဖွဲ့အစည်းကိစ္စများ လှူတန်းရန် ကိစ္စများ ရှိနေသဖြင့် ပုဂံအား သေချာမလေ့လာခဲ့ရပါ။ သရပါ တံခါးအား သေချာ မကြည့်ခဲ့ရသေးပါ။ ပုဂံသို့ နောက်တခေါက်သွားရန် စိတ်ကူးထားပါသည်။

ဒီတခေါက် ရောက်လျင်တော့ တပတ်ခန့် အချိန်ယူကာ နေရာအနံ့ ရောက်အောင် လိုက်ပတ်ကြည့်မည်ဟု စိတ်ကူးထားပါသည်။ ကံကောင်း ထောက်မ၍ ရွှေစည်းခုံ ဘုရား / ဓမ္မရံ ဘုရား / ဗူးဘုရား တို့ အခိုးမခံ ရစေရန်သာ ဆုတောင်း မိပါသည်။

လက်ရှိဘုရားသူခိုးများက ယုံရသည်မဟုတ်။ ထိုဘုရားကြီးများအား မြေကော်စက်များဖြင့် ထိုးကော်ပြီး တစစီဖြတ်တောက်ကာ အပိုင်းလိုက် ရောင်းစားလိုက်လျင် ဖြင့် နှောင်တချိန် ပုဂံ သွားလည် လျင် ဤနေရာ၌ ရွှေစည်းခုံ ဘုရား ရှိခဲ့ဖူးပါသည်ဟူ သော ဆိုင်းဘုတ်သာ ကြည့်ရတော့မည် ဖြစ်ပါသည်။

မဖြစ်နိုင်ဘူး မပြောပါနှင့် ။ အန္ဒိယ သူခိုးများကတော့ တန်၆၀ ရှိသော တံတားကြီး တခုလုံးအား ခိုးယူခဲ့ကြသည်ဟူသော သတင်းတပုဒ် ဖတ်မိလိုက်ပါသည်။တိုင်းပြည် အခြေအနေကောင်း သွားလျင်တော့ ပုဂံဘုရားဖူး နောက်တခေါက် လောက်ထွက်ချင်ပါသေးသည်။

Henry Aung ( Kachin )

20/04/2022 - Wednesday - 17;30 Pm